ដោះ​ស្បែកជើង​គប់​រូបថត ហ៊ុន សែន-ហេង សំរិន ត្រូវ​ជាប់​គុក​២ឆ្

 

បន្ថែមពីលើទោសជាប់ពន្ធនាគារ ២ឆ្នាំ អ្នកស្រី សំ សុខា ដែលជាជនជាប់ចោទ ត្រូវតុលាការបង្គាប់ ឲ្យបង់ប្រាក់ពិន័យ ចំនួន៥លានរៀលទៀត។ 

ការបង្ហោះ​វីដេអូ ​នៅលើ​បណ្ដាញ​សង្គម កាលពីអំឡុងខែមេសា ឆ្នាំទៅម៉ិញ​ ដែល​បង្ហាញ​ពី​សកម្មភាព​របស់ស្ត្រីម្នាក់ ​កំពុង​គប់ស្បែក​ជើង​ ទៅលើ​ស្លាក​សញ្ញា​គណបក្ស​ប្រជាជន​កម្ពុជា ដែលមានរូបលោក ហ៊ុន សែន និងលោក ហេង សំរិន នោះ ត្រូវបានសាលាដំបូងខេត្តកំពង់ស្ពឺ សម្រេចក្ដីហើយ កាលពីថ្ងៃទី២២ ខែមីនាម្សិលម៉ិញ។
អ្នកស្រី សំ សុខា ដែលជាអ្នកធ្វើសកម្មភាពគប់ និងជាអ្នកបង្ហោះវីដេអូនោះ ត្រូវបានតុលាការខេត្តមួយនេះ សម្រេចផ្ដន្ទាទោស ឲ្យជាប់ពន្ធនាគារ ចំនួនពីរឆ្នាំ និងបង់ពិន័យ​ជាប្រាក់ ចំនួន៥លានរៀល។
តុលាការបានចោទអ្នកស្រី សំ សុខា ពី«បទប្រមាថ»​ និង​ «បទ​ញុះញង់​ ឱ្យមាន​ការរើសអើង» និងបានរកឃើញថា អ្នកស្រី សំ សុខា បានប្រព្រឹត្តិអំពើនេះ កាលពីថ្ងៃទី០១ ខែមេសា ឆ្នាំ២០១៧ នៅត្រង់​ចំណុចផ្លូវលេខ៤៥ ចន្លោះគីឡូម៉ែត្រលេខ ៤-៥​ ស្ថិតក្នុងភូមិអុង ឃុំរាម ស្រុកព្រៃនប់ ខេត្តព្រះសីហនុ។
អ្នកស្រី ធ្លាប់​ត្រូវបាន​ផ្ដន្ទាទោស ដោយកំបាំងមុខម្ដងហើយ កាលពីចុងខែមករា ឆ្នាំ២០១៨ និងត្រូវបានតុលាការចេញដីការ ឲ្យតាមចាប់ខ្លួន ខណៈអ្នកស្រីបានភៀសខ្លួន ទៅកាន់ប្រទេសថៃ និងទទួលបាន នូវសិទ្ធិជ្រកកោន ពីឧត្ដមស្នងការសហប្រជាជាតិ ទទួលបន្ទុកជនភៀសខ្លួន (UNHCR) ដែលមានស្នាក់ការ ក្នុងប្រទេសថៃ។ តែផ្ទុយទៅវិញ អាជ្ញាធរថៃបានចាប់អ្នកស្រី បញ្ជូនមកកម្ពុជាវិញ មុននឹងអ្នកស្រី ត្រូវបានអាជ្ញាធរកម្ពុជា ចាប់ខ្លួនយកមកឃុំ រហូតមកដល់ពេលនេះ។
ករណីរបស់អ្នកស្រី ត្រូវបានជំនុំជម្រះ ជាថ្មី កាលពីថ្ងៃទី១៥ ខែមីនា សប្ដាហ៍មុន ប៉ុន្តែក្រុមចៅក្រមកាត់សេចក្ដី បានរង់ចាំរហូតដល់​ថ្ងៃទី២២ ខែមីនា ម្សិលម៉ិញ ទើបប្រកាសសាលក្រម៕